شیطان کے فریب سے بچنے کا طریقہ

شیطان نے انسان کو گناہوں میں مبتلا کرنے کے لئے اس کے چاروں طرف فریبوں کے جال بچھا رکھے ہیں اس کے مکرو فریب سے بچنے کے لئے کلمۂ طیبہ بہت اِکسیر ہے۔

حضرت ابو بکر صدیق رضی اللہ تعالی عنہ سرکاردوعالم ﷺ سے نقل فرماتے ہیں کہ ’’لَااِلٰہَ اِلَّااللّٰہُ‘‘ اور استغفار کو بہت کثرت سے پڑھا کرو۔ شیطان کہتا ہے میں نے لوگوں کو گناہوں سے ہلاک کیا اور انہوں نے مجھے ’’لَااِلٰہَ اِلَّااللّٰہُ‘‘ اور استغفار سے ہلاک کر دیا جب میں نے یہ دیکھا تو میں نے ان کو ہوائے نفس سے ہلاک کیا اور وہ اپنے کو ہدایت پر سمجھتے رہے۔ (جامع الصغیر )

میرے پیارے آقاﷺ کے پیارے دیوانو!شیطان جو ہمارا سب سے بڑا دشمن ہے وہ ایک لمحے کے لئے ہم سے غافل نہیں لیکن تعجب ہے کہ ہم اس سے بالکل غافل ہیں اس نے چاروں طرف مکروفریب کے جال پھیلارکھا ہے کہ ہم کسی طرح اس کے دام فریب میں آجائیں لیکن ہمارے آقا ﷺکی رحمتوں پر قربان کہ رحمت عالم ﷺ نے اس کے فریب سے بچنے کا سامان بھی عطا فرما دیا کہ کلمہ طیبہ اور استغفار کی کثرت شیطان کو ہلاک کر نے کا بہترین ہتھیار ہے۔

لہٰذا کلمہ طیبہ اور استغفار کی کثرت کر کے شیطان کو ہلاک کرو۔ اللہ عزوجل ہم سب کو توفیق رفیق نصیب فرمائے۔ آمین بجاہ النبی الکریم علیہ افضل الصلٰوۃ والتسلیم