شیطان کی شیطانیاں
📌شیطان کی شیطانیاں ۔
🌹اللہ تبارک و تعالی کا ارشاد ہے،
الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ ۖ وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ.
( سورة البقرة 268 )
اللہ تبارک و تعالی کی بندہ نوازی اور اسلوب تفہیم و تنبیہ کی کیا بات ہے ۔ تقابلی انداز اختیار فرماتے ہوئے بندے کو سمجھایا جا رہا ہے ۔
ایک طرف شیطان ہے اور اس کی دو خصلتیں ہیں
(1) ڈراتا ہے تمہیں کہ زکات و صدقات کی ادائیگی سے تم فقر و افلاس کا شکار ہو جاؤ گے ۔ تمہاری ، تمہارے اپنوں کی کئی ضروریات ادھوری رہ جائیں گی ۔
(2) فحاشی کا کہتا ہے ۔ جو بھی کہے گا ۔ اس کا ظاہر جیسا بھی ہو وہ ہوگا فحش ہی کے زمرے میں ۔
اور
اللہ ہے دوسری جانب اس کے مقابلے پر اور اس کی بھی دو شانیں ہیں جن کا وہ تم سے برملا وعدہ کر رہا ہے ۔
(1) عمومی مغفرت
(2) فضل عظیم ۔
اور آیت کے آخر میں اپنی ان شانوں سے مناسب دو صفتیں ذکر کر دیں ۔
اور اللہ وسعت والا ہے علم والا ہے ۔
گویا اس طرح حسن اختیار کا فیصلہ بندے پر چھوڑ دیا ۔
ایک معمولی عقل و دانش کے مالک کا فیصلہ بھی یہی ہو سکتا ہے کہ طرف اپنوں کی اختیار کرنا چاہیے نہ کہ غیروں کی اور اگر وہ اپنا ، اپنا بھی اور محسن و مربی و مخلص بھی ہو تو اس کی اطاعت شان بندگی ، فرض اور احسان شناسی ہے اور وہ غیر اگر کھلے دشمن ہوں تو ان سے کوسوں دوری لازم ہے ۔
بحیثیت کلمہ گو ہمارا عقیدہ ہے کہ اللہ تبارک و تعالی کا ہر فرمان واجب التسلیم ہے ، نادرستگی اور خلاف واقعہ ہونے کے ادنی ترین شبہ و احتمال سے بھی منزہ ہے ۔
لیکن اس کا تو اپنا کھلا چیلنج ہے ۔
وَعْدَ اللَّهِ حَقًّا ۚ وَمَنْ أَصْدَقُ مِنَ اللَّهِ قِيلًا .
( سورة النساء 122)
اللہ کا وعدہ حق سچ ہے اور کوئی ہے اللہ سے بڑھ کر سچ بات والا ۔
اور کچھ آیات پہلے فرمایا
وَمَنْ أَصْدَقُ مِنَ اللَّهِ حَدِيثًا .
( سورة النساء 87)
اور کون زیادہ سچا ہے اللہ سے بات بتانے میں ۔
فقیر خالد محمود عرض گذار ہے کہ قول اور حدیث دونوں جمع کر کے جتلا دیا کہ بات اپنی ذات کے بارے میں ہو یا کسی اور سے متعلقہ ، کسی بھی طرح کی ہو ہم سے بڑھ کر سچا ہے ہی کوئی نہیں ۔
اور ہم اہل ایمان بحمد اللہ تبارک و تعالی عقیدہ بھی یہی رکھتے ہیں ۔ اور اس کی تصدیق و تصویب بھی جناب باری تعالی سے موجود ہے
وَمَنْ أَحْسَنُ مِنَ اللَّهِ حُكْمًا لِّقَوْمٍ يُوقِنُونَ .
( سورة المائدة 50 )
اور یقین رکھنے والی قوم کے لیئے تو اللہ سے بڑھ کر اچھا حکم دینے والا کوئی ہے ہی نہیں ۔
مزید کرم فرماتے ہوئے شیطان کے ان بظاہر پر کشش اور اپنا فائدہ لگنے والے تزویراتی جھانسوں کی نقاب کشائی یوں فرمائی ۔
🌹يَعِدُهُمْ وَيُمَنِّيهِمْ ۖ وَمَا يَعِدُهُمُ الشَّيْطَانُ إِلَّا غُرُورًا .
( سورة النساء 120)
يَعِدُهُمْ = اندیشے پیدا کرتا ہے مال کم ہو جانے کے ، کوئی اچانک نمودار ہو پڑنے والی ذاتی و خانگی حاجت وغیرہا کے ، نہ خرچ کرنے سے جمع ہو کر بڑھ جانے کے ، معاشرے میں عزت و وقار ملنے کے ۔ کثرت مال کی وجہ سے کوئی عہدہ ، منصب اور کئی دیگر سربلندیاں ملنے کے امکانات کے
وَيُمَنِّيهِمْ = اور انہیں نہ پوری ہو سکنے والی تمناؤں کے سراب میں مبتلا کیئے رکھتا ہے ۔ ابھی بڑی عمر پڑی ہے ، ہو جائیں گی نیکیاں اور صدقات و خیرات ۔ چار دن تو عیش و عشرت کر لیں ۔
وَمَا يَعِدُهُمُ الشَّيْطَانُ إِلَّا غُرُورًا .
( سورة النساء 120)
اور شیطان کے یہ سارے وعدے سوائے فریب کے اور کچھ نہیں ۔
🙏اللہ تبارک و تعالی کی بارگاہ میں عرض ہے کہ ہم ابلیس اور اس کے گماشتوں سے سوائے تیرے فضل کے کسی طور بچ نہیں سکتے ۔
🤲یا اللہ یہ فقیر خالد محمود اپنے آپ کو اور اپنی ذریت کو شیطان مردود سے تیری ہی پناہ میں دیتا ہے ۔ دائمی پناہ عطاء فرما۔ آمین آمین آمین یا رب العالمین