اقسام حدیث

حدیث کی تعریف کے بعد اس کی بعض ضروری اقسام کی تعریفیں پیش کی جاتی ہیں:

مرفوع : جس حدیث میں رسول الله صلی اللہ علیہ وسلم کے اقوال افعال اور تقریرات کا بیان ہو۔

موقوف : جس حدیث میں صحابہ کرام کے اقوال احوال اور تقریرات کا بیان ہو۔

مقطوع : جس حدیث میں تابعین کے اقوال افعال اور تقریرات کا بیان ہو۔

متصل: جس حدیث کی سند سے کوئی راوی ساقط نہ ہو۔

معلق : جس حدیث کی سند کے شروع سے راوی کو حذف کر دیا جائے خواہ یہ حذف بعض کا ہو یاکل کا۔

مرسل : جس حدیث کی سند کے اخیر سے راوی کو ساقط کر دیا جائے مثلا تابعی حضور سے روایت کرتے اور صحابی کو چھوڑ دے

معضل : درمیان سند سے دومتوالی راویوں کو چھوڑ دیا جائے۔

منقطع بہ معنی اخص: دو سے زیادہ راویوں کو سند میں ایک جگہ سے یا دوراویوں کو متعدد جگہ سے چھوڑ دیا جائے۔

مضطرب: سند یا متن حدیث میں زیادتی نقصان یا تقدیم و تاخیر کر دی جائے۔

مدارج : متن حدیث میں راوی اپنایا غیر کا کلام ملادے۔

شاز: جس میں ثقہ راوی اپنے سے زیادہ ثقہ راوی کی مخالفت کرے (اس کا مقابل محفوظ ہے)۔

منکر: جس روایت میں زیادہ ضعیف راوی کم ضعیف کی مخالفت کرے( اس کا مقابل معروف ہے)۔

معلل : جس حدیث میں علت خفیہ قادحہ ہو مثلا حدیث مرسل کو موصولا روایت کیا جائے۔

صحیح لذاتہ: جس حدیث کے تمام راوی متصل عادل تام الضبط ہوں اور وہ حدیث غیر شاز اور غیر معمل ہو۔

صحیح لغیرہ : جس حدیث میں کمال ضبط کے سوا صحیح لذاتہ کی تمام صفات ہوں اور ضبط کی کمی تعدد طرق روایت سے پوری ہوجائے۔

حسن لذاتہ: جس حدیث میں کمال ضبط کے سوا صحیح لذاتہ کی تمام صفات ہوں اور یہ کمی تعدد طرق سے پوری نہ ہو۔

حسن لغیرہ: جوحدیث صحیح لذاتہ کی ایک سے زیادہ صفات سے قاصر ہولیکن یہ کمی تعدد طرق روایت سے پوری ہوجائے۔

ضعیف : جوحدیث صحیح لذات کی ایک سے زیادہ صفات سے قاصر ہو اور تعدد طرق سےوہ کمی پوری نہ ہو۔

متروک : جس حدیث کی سند میں کوئی راوی متہم بالکذب ہو۔

موضوع : جس حدیث کی سند میں کوئی ایسا راوی ہو جس سے وضع فی الحدیث ثابت ہو۔

غریب : جس حدیث کی سند کا کوئی راوی سلسلہ سند کے کسی سے روایت میں منفرد ہو۔

عزیز: جس حدیث کے دو راوی ہوں پھر سلسلہ سند کے ہر راوی سے کم از کم دو شخص روایت کرتے ہوں۔

مشہور : جو حدیث دو سے زیادہ طرق سے مروی ہو (یعنی سلسلہ سند میں کسی شخص سے بھی تین سے کم راوی نہ ہوں اور نہ زیادتی حد تواتر سے کم ہو )

غریب عزیز اور مشہور ان میں سے ہر قسم کو خبر واحد کہا جاتا ہے

متواتر: جوحدیث ہر دور میں اتنے کثیر طرق سے مروی ہو کہ ان روایات کا توافق على الكذب عادة محال ہو۔