عرسِ رضوی میں علامہ ارسلان میاں کا خطاب

عرسِ رضوی کے موقع پر حضرت علامہ مفتی محمد ارسلان رضا خان حفظہ اللہ تعالیٰ کا خطاب یوٹیوب پر سننے کا موقع ملا۔ یہ خطاب اپنے اندر علم و حکمت، اعتدال و میانہ روی، محبتِ رسول صلی اللّٰہ علیہ وسلم، مسلکِ اہلِ سنت اور تعلیماتِ اعلیٰ حضرت کا ایک حسین امتزاج لیے ہوئے تھا۔

خطاب کی سب سے نمایاں خوبی یہ تھی کہ قرآنِ کریم کی آیات، احادیثِ نبویہ، تعلیماتِ اکابر اور فکرِ اصلاح و دعوت کو نہایت خوب صورتی کے ساتھ یکجا کیا گیا۔ گفتگو میں علم بھی تھا، حکمت بھی؛ دردِ امت بھی تھا اور اصلاح کی فکر بھی۔ یہی وجہ ہے کہ پوری گفتگو ایک جامع، مؤثر اور دل نشیں پیغام بن گئی۔

آج کے اس پرفتن دور میں، جب معمولی اختلافات بھی باہمی دوریوں اور تلخیوں کا سبب بن جاتے ہیں، ہمیں ایسے ہی اندازِ گفتگو کی ضرورت ہے۔ ایسا انداز جو اپنے مسلک اور عقائد کی ترجمانی بھی کرے، مگر ساتھ ہی امت کے اتحاد اور مسلمانوں کی باہمی محبت و اخوت کو بھی مضبوط کرے۔

خطاب میں نہ اشتعال تھا، نہ سخت کلامی؛ نہ کسی کی تحقیر و تنقیص کا انداز، نہ اختلاف برائے اختلاف کی روش۔ بلکہ ہر بات میں حکمت، اعتدال، خیر خواہی اور اصلاح کا پہلو نمایاں تھا۔ یہی وہ طرزِ دعوت ہے جو دلوں کو جوڑتا ہے، فاصلے کم کرتا ہے اور انسان کو اپنی اصلاح کی طرف متوجہ کرتا ہے۔

محبتِ رسول  صلی اللّٰہ علیہ وسلم صرف زبان سے اظہار کا نام نہیں، بلکہ آپ صلی اللّٰہ علیہ وسلم کی تعلیمات کو اپنانے، اخلاق کو سنوارنے، مسلمانوں سے محبت کرنے اور امت کی خیر خواہی کا نام بھی ہے۔ منبر و محراب سے جب یہ پیغام علم و حکمت اور اخلاص کے ساتھ بلند ہوتا ہے تو اس کے اثرات دلوں تک پہنچتے ہیں۔

بلاشبہ حضرت علامہ مفتی محمد ارسلان رضا خان حفظہ اللہ تعالیٰ کا یہ خطاب اسی ذوقِ دعوت، فکرِ اصلاح اور حکمتِ تبلیغ کی ایک خوب صورت مثال محسوس ہوا۔ ایسے خطابات نہ صرف علم میں اضافہ کرتے ہیں بلکہ انسان کو اپنے کردار، اخلاق اور طرزِ زندگی پر بھی غور کرنے کی دعوت دیتے ہیں۔

اللہ تعالیٰ مظہرِ حجت الاسلام، حضرت علامہ ارسلان میاں حفظہ اللہ تعالیٰ کو صحت و عافیت کے ساتھ عمرِ خضر عطا فرمائے، ان کے علم و عمل میں برکتیں عطا فرمائے، ان کی فکر و نظر کو مزید وسعت عطا فرمائے، اور ان کی زبان و قلم کو ہمیشہ حق، اعتدال، محبتِ رسول صلی اللّٰہ علیہ وسلم اور اصلاحِ امت کے لیے مؤثر بنائے۔

اللہ تعالیٰ ان کی دعوت و تبلیغ کو مزید قبولیت عطا فرمائے اور ان کے ذریعے بہت سے دلوں کو علم، محبت اور ہدایت کی روشنی نصیب فرمائے۔

آمین بجاہِ سید المرسلین صلی اللّٰہ علیہ وسلم

#احمدرضامغل

بتاریخ

26 صفر المظفر 1448 عروس البلاد کراچی

( بیان کا لنک کمنٹ میں ہے )